कु’न अपना हा, पराया कु’न, क्या मी पता निं हा
ओह्ल्लै हा दुनिया शा, मगर इन्ना मता निं हा ।
मेरी तलाश ही मिगी, हर कोई हा जानदा
मेरा गोआचना, मगर मुद्दा बड़ा निं हा ।
कंधें गी चुक्की-चुक्कियै, अस होए दूर-दूर
कंधें च रक्खेआ असें, कोई गला निं हा ।
परदे लोआऐ हे बड़े, दुनिया ने मी मगर
अक्खीं च मोतिया ते हा, इन्ना लवा निं हा ।
पैह्लें बी छटियें-छटियें, चेते ब’रदे हे बड़े
मन आह्ले कोठुऐ, मगर इन्ना चुआऽ निं हा ।
मी गल्तफैह्मी ओह्दी इ’यै रास आई ही
ओह्दे बगैर मेरा कोई आसरा निं हा ।
मेरे प कर्ज हा जो, उ’ल्लेआ सिरा दा नेईं।
तेरे बगैर हक मेरा, कोई अदा निं हा।
तूं गै मसाल ज़िंदगी दी, तूं गै ते वफ़ा
तेरे शा बद्ध बी ते, कोई बेवफ़ा निं हा ।
