कचैले हे, कसैले हे, कड़ांगे हे क जां दाह्ले
कदूं हिरदे दी थाली चा, कुसै हे चाऽ मेरे ताले ।
कदूं मंजल दी लोऽ सजरी मेरे पैंडें तपाशी ही
करी गे चाननी बत्ता मेरे पैरें दे गै छाले ।
कुतै आसां, कुतै मेदां, कुतै रीझां, कुतै तांह्गां
धङानै ला ‘रनैं लोथां सर्हानै तूं ,मना, ठाले ।
भला ढट्ठी दी इस कुल्ली कु’न्नै हे बालने दीवे
धुखा दे ओह्, मना, होने जि’ड़े अरमान थे पाले ।
समुंदर छोलियै हिरखी तरारे जो चढ़े गासा
छड़े गरजे, छड़े मिलके, ब’रे निं ओह् बदल काले ।
जि’ड़ा करदा रेहा झेइयां, चिरै दा ओह् मरी गेदा
अनु मेरे बजूदै चा देआ दा कु’न मिगी आले ।
लुटानी मौत-मंडी गै तूं छेकड़ रास चाएं दी
मनै दी कोठिया कैह्ली ‘बगान्ना’ ला ‘रनैं ताले ।
