मसले किश ऐसे बनदे रेह् , के अस मतवाले होंदे गे
नित्त पच्छ दिलै गी लगदे रेह् , ते काग़ज़ काले होंदे गे ।
जेठा दी धुप्पैं बी साढ़ी छाती दे हाड़ नेईं सुक्के
चेतें दे डिग्गल घिरदे रेह्, नैने परनाले होंदे गे ।
दिन-रातीं अलख जगाई ही , अपने सुर-ताल सधारे हे
फ्ही ऐसे मौसम बी आए, जे अस बेताले होंदे गे ।
गर्मी शा जिन्ना डरदे हे, उन्ना गै परसा पौंदा हा
जिन्ना अस ठरदे रेह् उन्ने, मूंहज़ोर स्याले होंदे गे ।
अकली शा खाल्ली हे जिन्ने, अस उन्ने गै बड़बोले हे
मत्त मासा-मासा औन लगी, ओठें पर ताले होंदे गे ।
अस चौनें चूह्कें दे राही , किश जोगी बी, किश भोगी बी
फलोहार बी ठुंगदे रेह्, सज्जना, कन्नै गै नाले होंदे गे ।
पैंडा ते बेशक औखा हा, पर तेरी खोज नेईं छोड़ी
फ्ही जिंद बी कसरी पौन लगी, पैरें बी छाले होंदे गे ।
हुन धूफ ते बत्ती करना बी, साढ़े गित्तै नामुमकन हा
सुखने जे नित्त-नित्त मरदे रेह्, अस बी मुतकाले होंदे गे ।
अस साधक अपनी ईना दे , अस सक्के अपनी रत्तु दे
फट्ट जिन्ने ज़ैदा लगदे रेह् , उन्ने गै ज़याले होंदे गे ।
फ्ही ऐसा बेल्ला बी आया, हर चीज़ परानी पौन लगी
चेते बी धुंदले पौन लगे, अक्खैं बी जाले होंदे गे ।
.
