बशक्क सम्यान जीने दा ते सारें कोल होंदा ऐ
नरोआ तन, नरोआ मन ज़रा भागें नै थ्होंदा ऐ ।
दोआs-दारू ज़माने दी इस्सी कारी नेईं औंदी
मड़ा, एह् फट्ट जीभा दा बड़ी मुश्कल भलोंदा ऐ।
तुसें दरेआ ते ब’न्ने दा, इस्सी कमज़ोर निं मिथेओ
अड़ी अपनी प आवै तां कु’दे कोला थम्होंदा ऐ !
चली बी जाs अगर दमड़ी, जुड़ी सकदी ऐ मगरा बी
दिलै गी ठेस पुज्जै तां बड़ा नक्सान होंदा ऐ।
सन्हाकी भाख लांदा ऐ शलैपा तेरे नैने दा
ना तेरी भाख थ’मदी ऐ, ना मेरा जी भरोंदा ऐ।
जिस्सी ऐ इश्क़ मंज़ल नै , उस्सी छाले नेईं भाखे
जेह्ड़ा छालें शा डरदा ऐ, घनी छामां बसोंदा ऐ ।
मी न्हेरे -चानने पक्खें दे प्हाड़े समझ निं आंदे
कुसै दा चन्न चढ़दा ऐ, कुसै दा दिन घरोंदा ऐ ।
होऐ साढ़ी मलाटी ते फ्ही गल्लां नैन करदे न
ना मेरे शा बलोंदा ऐ, ना उं’दे शा बलोंदा ऐ ।
उ’दे रोस्से शा डर ‘साजन’ जिस्सी रोस्सा नेईं भाखा
ते जे ओह् जाs कुतै रुस्सी, कुसै शा निं मनोंदा ऐ।
