किश इ’यां बी अलख जगानी पौंदी ऐ
कौड़े घुट्टैं उमर लंघानी पौंदी ऐ ।
अग्गी ख़ातर दरेआ तरने पौंदे न
पानी ख़ातर अग्ग बी गाह्नी पौंदी ऐ ।
आसन देना पौंदा ऐ किश दुक्खें गी
किश खुशियें गी तीली लानी पौंदी ऐ ।
ऐह्में थोड़े 'जित्तो-'जित्तो' होंदा ऐ
कनकु दे बिच रत्त मलानी पौंदी ऐ ।
चुप्प गै रौह्ना पौंदा ऐ किश गल्लें पर
मतियें गल्लैं मिट्टी पानी पौंदी ऐ ।
टांका बी लाना पौंदा ऐ कुसै जगह
कुतै-कुतै गाह्टी बी पानी पौंदी ऐ ।
बिपता कोला डरियै जीना किस कारी
बिपता कन्नै अक्ख मलानी पौंदी ऐ ।
कल्ल जिं’दे पर जिंद लटाई ही 'साजन'
अज्ज उं’दे शा जान बचानी पौंदी ऐ ।
