बड़े गै रंगें दा ,जीवन च ऐ खलार बड़ा
मिली ऐ स्हाबी गै मोहलत ,बो मन चनार बड़ा ।
मेरे गै कच्छ ऐ घोड़ा , मदान कच्छ मेरै
मेरा फतूर बो ,मेरे प ऐ सुआर बड़ा ।
बड़ा गै तंग ख़्याली दा दौर ऐ, लेकन
शुकर ऐ ,खु’ल्ला ऐ नजरी दा बी दुआर बड़ा ।
रवां-दवां ऐ सगंधी दा काफला ,लेकन
मनै च, बीते दिनें दा बी ऐ तुआर बड़ा ।
खलासा, नेहा कोई ज़िंदगी दा नेईं होआ
जनेहा ,मेरे नै कीता हा उस करार बड़ा ।
मकाम, ऐसा कोई ज़िंदगी च नेईं आया
जि’दी तलाश च ,खज्जल हा में, खुआर बड़ा ।
जो ज़िंदगी ऐ मिली ,उस च खोह्न -खोही ऐ केह्
जो सब्ज़ बागें दा ,अग्गें ऐ इक्क पुआर बड़ा ।
