गज़ल

कुसै निं झाली मेरी छाल मारी
जलदा रेहा में जरमें शा कल्ला ।

में लोऽ निं मंगी चन्न-सूरजै शा
चलदा रेहा में जरमें शा कल्ला ।

पीड़ें दी भट्ठी बनी मोम इत्थें
घलदा रेहा में जरमें शा कल्ला ।

जमाने भरै दियां अनमुक्क चुब्भां
झलदा रेहा में जरमें शा कल्ला ।

अनसंभ पीड़ें ते हौकें दी गोदा
पलदा रेहा में जरमें शा कल्ला ।

कदें रोंदे कन्नै, कदें हसदे कन्नै
रलदा रेहा में जरमें शा कल्ला ।

दुवधा दी तपदी कढ़ाइया च आपा
तलदा रेहा ‘दोषी’ जरमें शा कल्ला ।