किश इस चाल्ली ओह्दा चेता भलाया में
फ्ही निं ओह्दे नांऽ दा गीत कोई गाया में।
मेरे कश ओह्दा किश कीमती सम्यान हा
किश तीली लाई दित्ता, किश परवाया में ।
उ'नें गैह्लियें नै वाबस्तगी असें छड्डी दित्ती
जि’नेंगी मक्का-मदीना-काब्बा हा बनाया में ।
फ्ही निं पीते असें कदें जाम अक्खें दे
फ्ही निं कुसै गी `जान' आखी बलाया में ।
कदें मलाटी ही रस्तै जे होई ही जंदी
ढीठ हास्से अग्गें आपूं गै सिर झकाया में ।
हुन जे ओह्दी कोई गल्ल छेड़दा ऐ
इ’यां बनी जन्नां, किश निं सुनेआ-सनाया में ।
हुन तेरियां हिमायतां मेरे शा निं होंदिया
जिं’दे लेई जग-ज्हान बैरी हा बनाया में ।
जिन्ना सांभनां उन्ना गै खिल्लरी की जन्नां
बड़ा भलाया उसगी, फ्ही बी निं भलाया में ।
