गज़ल

भाव भरोचा पीड़ें आह्‌ला गीत अजें में गाना ऐ
हिरखी कासा लेइयै सदरें, बस्ती-बस्ती जाना ऐ।

सांझ-भ्याली रिश्ते-नाते, मित्तरोचार नभाने गी
रुस्से दा जो मीत फरेबी उमरें थमां मनाना ऐ।

फंघ सोआकी परखै करनां गास डोआरी भरने गी
उद्दम आखै करदा कन्नै तेरा साथ नभाना ऐ।

बूह्‌टा-बूह्‌टा, पत्तर-पत्तर, डाह्‌ल्ली-डाह्‌ल्ली आखै दी
बागै दी किश सांभ करी लै नेईं तां खिंडी जाना ऐ।

हिरख सबूरा बंडदे जाना बत्ता मिलने आह्‌लें गी
फरको-फरकी होंदी माड़ी, आपूं गी समझाना ऐ।