जीने तांईं लक्ख खुदाई देई ओड़ी ऐ
मरने तांईं थां-थां खाई देई ओड़ी ऐ।
ओह्ब्बी तां गै इन्ना चैड़ा होई गेदा ऐ
में किश खबरै मती सफाई देई ओड़ी ऐ।
हुन हर कोई बक्ख-बक्ख मंदर मस्जिद तुप्पै
रब्बा, तु’म्मी मती खुदाई देई ओड़ी ऐ।
जीने तांईं खुट्टा पैहा बी निं दित्ता
मरने तांईं पाई-पाई देई ओड़ी ऐ।
एह्दा मतलब एह् निं, तूं मर्यादा लंघैं
बेशक तूं मी मूंह्-दखाई देई ओड़ी ऐ ।
लड़ लाया ऐ कट्ठे होने-जीने तांईं
बंद्धै पौने दी न साई देई ओड़ी ऐ।
न्हेर-मन्हेरा चौन्नें पासै छाया तां गै
जीवन-जोती अत्त सोआई देई ओड़ी ऐ।
हर कोई अपनी-अपनी चाल चला करदा ऐ
पैद्दें गी की इन्नी फाही देई ओड़ी ऐ ।
