अज्ज फ्ही चेतै आइयां अक्खां
अक्खें बड़ा, रोआइयां अक्खां ।
रंग गंदमी, तिल ठुड्डी उप्पर
रब्ब ने खूब बनाइयां अक्खां ।
मरुथले दे मिरगें दे साहीं
उमरें शा तरेहाइयां अक्खां ।
जदूं ओह् साढ़े बेह्ड़ै ही आई
कि'यां असें बछाइयां अक्खां ।
में गलाया, जिंद तूं मेरी
सुनियै, बस शरमाइयां अक्खां ।
ते में फड़ेआ हत्थ जदूं हा
अदूं बड़ा, घबराइयां अक्खां ।
दुनिया दी कोई सुध नेईं ही
अक्खैं जदूं समाइयां अक्खां ।
फ्ही अक्खां परदेसन होइयां
होई गेइयां पराइयां अक्खां ।
केह् पुछदा, कुसगी पुछदा
फ्ही की ऐह्में मलाइयां अक्खां?
हुन अक्खें दे बड़ी दूर बसेरे
फ्ही की चेतै आइयां अक्खां !
फ्ही चली पे दौर जामें दे
नशे दे जोर भलाइयां अक्खां ।
