गज़ल

अंधी-झक्खड़ , न्हेरा दूर नसाई चुक्के आं
अस ते अपनी जीवन जोत जगाई चुक्के आं ।

मन नेईं मनदा जिंदू गी बनझाई चुक्के आं 
जीवन दे हुन ओड़कशोऐ आई चुक्के आं ।

जो-जो किश बी थ्होआ सिर मत्थै पर मेरै 
बाकी सब किश मनै कशा मनसाई चुक्के आं ।

अंदर-बाह्‌रैं तांह्‌गे दे गुंझल गै गुंझल 
इक-इक तांह्‌गै कन्ने पेचा पाई चुक्के आं ।

सब किश है, पर फ्ही बी लगदा किश बी नेईं ऐ 
कैसी मृगतृष्णा इच मन पलचाई चुक्के आं ।

ऐसा इक जंगल हा, कोई रस्ता नेईं हा 
अपने पैरें छित्तियै घास बनाई चुक्के आं ।