छुड़ तू हत्थ दनां मेरा जे मंजल गी पाना ऐ
तूं ते उम्र अजें जीनी, में ते टैम टपाना ऐ।
चुगदै फंघ कपोई गे, दाना टप्पे दे अंदर
ना धरत मिगी सांभै, ना मेरा गास ठकाना ऐ।
हिरखी बत्ता चलना जे हिरदा जन्न बनाई लै
इत्थै मोम निं चलदा, ङारें पर पैर टकाना ऐ।
जेह्दे पर निं हक तेरा, छुड़ी खलासी दे उसदी
दिक्खी-दिक्खी बाग बगान्ने कीऽ मन तरसाना ऐ।
तरले में नेईं करने, गरदन जाग भमै मुड़की
हून तफानें दे अग्गें सिर नेईं बिंद नुआना ऐ।
भुक्खे दा कीड़ा कोई पौड़ें गी ऐ खा करदा
भुक्ख मटानी कीड़े दी जां रुक्ख बचाना ऐ।
तूं दे हिम्मत, ओ रब्बा ते साह् बक्ख दुहारे दे
स्हान बगान्नें दा, किश अपनें दा कर्ज मकाना ऐ।
