गज़ल

स’ञां दी हीखी ढलै बल्लें-बल्लें
चन्नै दी चानन घुलै बल्लें-बल्लें ।

जोवन-जवाला भखै मट्ठी-मट्ठी
रूपै दा मौह्‌रा घुलै बल्लें-बल्लें ।

उं’दे औने दी हीखी अंदर किश बाकी
हिरखै दा दिया बलै बल्लें-बल्लें ।

उमर गाली सारी, नेईं हत्थ आया
चक्कर समें दा चलै बल्लें-बल्लें।

बड़ा हिरख कीता, में हिरदै बसाया
अज्ज-कल्ल करदा, छलै बल्लें-बल्लें।

हुतलापन नेईं चंगा कदें बी
मेह्‌नत दा फल फलै बल्लें-बल्लें ।

बड़ा हिरख ‘दोषी’ मिगी ओह् जतांदा
थोह्‌रां एह् लांदा दिलै बल्लें-बल्लें।