ओह्दा कर्म जेल्लै अक्लें प सोआर होई जंदा
इस नखिद्धी जेही दुनिया च गै चमत्कार होई जंदा।
छड़े वजनें, रदीफें कन्नै कुसै ने शायर केह् होना
ओह् जि’दी काह्न्नी फड़ी लैंदा, शाहकार होई जंदा।
एह् मान-रुतबे-पदवियां रेही जंदे ने इक पास्सै
जिदे भागैं ओह्दी फकीरी, ओह् शाहुकार होई जंदा ।
अंदरें दी पलीती निं छपदी उच्चे गीत-गज़लें च
जेह्का सुन्नैं गी समझदा सच्चा फनकार होई जंदा ।
असेंगी झूठै दी गै खोह्, असें बस झूठ गै जीना
सच्चै नै चलना, उप्पर नंगी तलोआर होई जंदा ।
मता औखा ऐ अपनी समझै गी मिथ्या समझना
इन्नी मत्त आई जा, अपना गै उद्धार होई जंदा।
पढ़ी गीता-कुरान-बाइबलां कदें लौ निं जगदी
छड़ी ब्रह्म-चर्चें नै निं आत्म-साक्षात्कार होई जंदा।
एह् मैह्ल, पैहे, सुन्ना-चांदी किश कम्म निं औंदे
जेह्का मुरशिद दा लड़ फड़दा उ'ऐ पार होई जंदा।
