समींदा इक जगह मन कि’यां, हे मुकाम बड़े
ते मेरे चाएं दे घोड़े हे बेलगाम बड़े ।
में अपने आप चा बी बाह्र निकली औंदा, पर
मेरे शा बद्ध हे ,मेरे बी किश गुलाम बड़े ।
में पक्की पक्कियै बी दिक्खेआ ऐ केईं बारी
हठै दे लोहे च ,रेही जंदे फ्ही बी खाम बड़े ।
कमी कुतै न कुतै मेरै रेही गेई खबरै
उसी निं मिलने दे कीते हे इंतज़ाम बड़े ।
में डोगरा आं, में प्यूह्ली बी जि’ल्लना नेईं आं
बा तेरे शैह्र च होंदे न कत्ले-आम बड़े ।
तूं जांची-परखियै गै मुँह एह् खोह्लेआं, पुत्तरा
नशे बड़े न ते नकली न किश किमाम बड़े ।
एह् खुट्ट पाई गै दिंदा मनै दा सनेआरा
बा गैह्नें आह्लें दे खबरै की तामझाम बड़े।
एह् जानी-जान ऐ दुनिया, पता न औक़ातां
मर्हक्खे आह्लें दी शक्लां ते एहतराम बड़े ।
एह् गल्ल सच्च ऐ ,पीता असें ऐ जैह्र मता
एह् गल्ल होर ऐ, अस बी ते आं ख़य्याम बड़े ।
