सबक़ इश्क़ दा जदूं में पढ़ेआ फिर केह् होएआ पुच्छ निं अड़ेआ। अजब खलबली मची ही मेरै पता निं कु'न हा आंदर बड़ेआ । अंग-अंग मेरा खिड़ी खड़ोता रुप सन्हाका डाह्डा चढ़ेआ । अंदर बाह्रें चानन होएआ न्हेरा जाई न्हेरें बिच्च दड़ेआ । तुख़म नफ़रतें सड़ी-गली गे बीs हिरखै दा थां-थां रढ़ेआ। मेरा 'में' हा गेआ गोआची तूं गै तूं बस जीह्बा चढ़ेआ । दूई-द्वैत दे झगड़े मुक्के वह्दत आह्ला रस्ता फड़ेआ। सज्झर,शदाइयें फ़रक़ दनां निं अज्ज 'पूरण' दी नज़रें अड़ेआ ।
OUR AUTHORS
