स’ञां दे परछामे कोला नस्सी डरना किन्ने चिर
सोचैं पाली भै न्हेरें दा कण-कण मरना किन्ने चिर !
की नेईं तुप्पी लैचै कारी, फट्ट भलेरी राम देऐ जो
अल्लें घाएं लून सट्हाइयै पीड़ें ई जरना किन्ने चिर !
भौड़ें नै भिड़ने दा कोई चेचा कड्ढनै पौना तोड़
काग़ज़ दी इस देह्-किशती ने आखर तरना किन्ने चिर !
रुढ़ी निं जायां निक्कें हाड़ैं हाठ दनां किश उच्चा कर
अजें पता निं इस बदली ने त्रुट्टी ब’रना किन्ने चिर !
मेरा बातन पुच्छा करदा, मेरे भोलें दाएं गी
नेईं सफलता कन्नै करियै इ’यां हरना किन्ने चिर !
चाढ़ दनां मुसकान दा सूरज, डिग्गल गम दे छट्टन किश
शैह्र मेरे दी इन अक्खीं ने छम-छम ब’रना किन्ने चिर !
इक दिन करनै पौना निशचा औखें कन्नै लड़ने ताईं
झूठी आसें, फिक्की सद्धरें मनें ई भरना किन्ने चिर !
बत्तैं अक्खीं पत्थर होइयां, कोई सनेहा आवै उ’दा
इंतजा़र मैं उसदा 'अम्बर' होर बी करना किन्ने चिर !
