स’ञां पेइयां घर चल , चल बनजारेआ
बंगां बेची-बेची सारा दिन तूं गुजारेआ।
मिट्टी दी खढालियें ओ सज्जना तुई ठग्गेआ
खेढनुऐं खेढी एह्के अजें नेईं तूं रज्जेआ
खेढें दे गै चाएं इ'नें सूली तुकी चाढ़ेआ
बंगां बेची-बेची सारा दिन तूं गुजारेआ
स’ञां पेइयां घर चल , चल बनजारेआ ।
लोभें दे गै लुब्भें बिच पाली ऐ तूं लालसा
बारस - वरास्तें तूं बनी बैठा, वारसा
जानी - बुज्झी मालकै दा चेता तूं बसारेआ
बंगां बेची-बेची सारा दिन तूं गुजारेआ
स’ञां पेइयां घर चल , चल बनजारेआ ।
सज्जी-सजाई दियां हट्टियां एह् तेरियां
कुतै लेखै औनियां नेईं खट्टियां एह् तेरियां
खाल्ली - खाल्ली हत्थें जाना ऐ खलाड़ेआ
बंगां बेची-बेची सारा दिन तूं गुजारेआ
स’ञां पेइयां घर चल , चल बनजारेआ ।
औखा बड़ा होंदा इक रिश्ता त्रोड़ना
आखदे न चंगा मेले भर दे गी छोड़ना
मेला दिक्खी-दिक्खियै तूं हुट्टेआ, नेईं हारेआ
बंगां बेची-बेची सारा दिन तूं गुजारेआ
स’ञां पेइयां घर चल , चल बनजारेआ ।.
