हिरखी तूंबै तार मना दे छेड़ी-छेड़ी
बिसली रात बजोगन कर नेईं होर लमेड़ी।
हिरखी चूरी तूं मीं रज्जी ख़ान नेईं दित्ती
तेरे तालें भुञां अड्डी लान नेईं दित्ती
तूं नेईं बुज्झी गुज्झी सार मना दी मेरी
बिसली रात बजोगन कर नेईं होर लमेड़ी।
उमरें दी तरेहाई हीखी मुकदी नेइयों
एह् इश्क़ै दी गिल्ली खेसी सुकदी नेइयों
पीड़ें दी इस तत्ती धुप्पा रेड़ी-रेड़ी
बिसली रात बजोगन कर नेईं होर लमेड़ी।
ना पौंदी मीं पौंगर ना में भलेआं सुक्कां
में सदियें शा दीद 'बगान्ना' तेरी तुप्पां
एह् नैनें दे डूंह्गे सागर गेड़ी-गेड़ी
बिसली रात बजोगन कर नेईं होर लमेड़ी।
