में शगनैं दरेहास रखाया, तोरन दोआर टंगाए
मेरे भाग डोआठन टप्पी अज्ज कुधरै घर आए ।
जदुऐं दे सुख मेरै बौह्ड़े, अंग-संग प्रीत ऐ जागी
आस फंघुऐं डारा भरियां, प्रीतम लैने थाह्ग्गी
बिंद घड़ी झलकारे गित्तै जुगें शा डेरे लाए
में शगनैं दरेहास रखाया, तोरन दोआर टंगाए
मेरे भाग डोआठन टप्पी अज्ज कुधरै घर आए ।
केईं बारी अक्खीं दे ओह्ल्लै आस दे सुखने टुट्टे
पल-खिन रैन-मुसाफिर फ्ही बी जीवन शा नेईं हुट्टे
जीने दी इस अमर खेढ ने लक्खां भेस बटाए
में शगनैं दरेहास रखाया, तोरन दोआर टंगाए
मेरे भाग डोआठन टप्पी अज्ज कुधरै घर आए ।
कु’त्थै बैठा मौन लखारी अनमुक्क गाथां लिखदा
नमें-नमें सिरजदा चित्तर, नमें गै रूपें दिखदा
कल्ल अज्जै शा होऐ सोआया, दिन बदले मन भाए
में शगनैं दरेहास रखाया, तोरन दोआर टंगाए
मेरे भाग डोआठन टप्पी अज्ज कुधरै घर आए ।
