झुंड रितुयें दी रानी दनां चुक्केआ
ते ब्हार आई गेई रौंसली।
सीत किश दिनें इच गै ऐ मुक्केआ
ते ब्हार आई गेई रौंसली।।
फुल्लें कन्नै डाह्ल्लियां होई भरभूर
धारें दा शलैपा लग्गै जि'यां ऐ हूर
मन दिक्खी-दिक्खियै नेईं उक्केआ
ते ब्हार आई गेई रौंसली
सीत किश दिनें इच गै ऐ मुक्केआ
ते ब्हार आई गेई रौंसली।।
राग छेड़ी कोयलां-पपीहे गीत गान
भोली-भाली कलियें दा मन भरमान
डुआर भौरें दा कोल आई ढुक्केआ
ते ब्हार आई गेई रौंसली
सीत किश दिनें इच गै ऐ मुक्केआ
ते ब्हार आई गेई रौंसली।।
रची दित्ती कुदरतै रचना प्यारियां
थाह्र-थाह्र मैह्कै दी केसर क्यारियां
नंद रौंसें दा ऐ हर कुसै लुट्टेआ
ते ब्हार आई गेई रौंसली
झुंड रितुयें दी रानी दनां चुक्केआ
ते ब्हार आई गेई रौंसली
सीत किश दिनें इच गै ऐ मुक्केआ
ते ब्हार आई गेई रौंसली।।
