तारें गी बजोग कैह्दा, कुसै नेईं बचारेआ
न्हेरी रातें जि’नें सारा जीवन गुजारेआ
तारें गी बजोग कैह्दा, कुसै नेईं बचारेआ।
आखदे त्रेल जिस्सी, अत्थरूं न तारें दे
अनबिद्धे मोती जि'यां खिल्लरे न हारे दे
बेदना दे मारें दस्सो, केह् निं हा स्हारेआ
न्हेरी रातें जि’नें सारा जीवन गुजारेआ
तारें गी बजोग कैह्दा, कुसै नेईं बचारेआ।
निक्के-निक्के तारे किन्ने दरद लेई फिरदे
कुसै बी फरोले नेईं कदें इं'दे हिरदे
असें इं'दा चेता नेईं मनै चा बसारेआ
न्हेरी रातें जि’नें सारा जीवन गुजारेआ
तारें गी बजोग कैह्दा, कुसै नेईं बचारेआ।
तारें गित्तै होर काली रात बझोंदी ऐ
बदली जे कोई कदें आइयै बसोंदी ऐ
उ’न्नै बी नेईं इं'दा, किश बी सोआरेआ
न्हेरी रातें जि’नें सारा जीवन गुजारेआ
तारें गी बजोग कैह्दा, कुसै नेईं बचारेआ।.
