मिट्ठी-मिट्ठी, प्यारी-प्यारी साढ़ी बोल्ली डोगरी
कु’न्न तुकी मिसरी पलाई घोली डोगरी ।
डोगरें दी मादरी ज़बान तूं ऐं, डोगरी
डोगरें दी आन-बान शान तूं ऐं, डोगरी
चतर-चनार किन्नी आली-भोली डोगरी
कु’न्न तुकी मिसरी पलाई घोली डोगरी ।
सिठनियें तेरियें च मिट्ठी-मिट्ठी गालियां
जीजें गी मखौल ब्हान्नै करै दियां सालियां
चाएं-चाएं कोल बौंह्दी आई टोल्ली, डोगरी
कु’न्न तुकी मिसरी पलाई घोली डोगरी ।
घोड़ियें - सुहागें तेरे बोल मढ़ोए दे
सगने-समोदें आह्ले गीत बी लखोए दे
भाखें दे परागड़ें भरोची झोली, डोगरी
कु’न्न तुकी मिसरी पलाई घोली डोगरी ।
भावें दे छोआले तेरे मनै इच खट्टे दे
पीड़ें दे पटारू बी तूं सांभी-सांभी रक्खे दे
मनै आह्ले भेद सारे दस्सै खोह्ल्ली डोगरी
कु’न्न तुकी मिसरी पलाई घोली डोगरी ।
डोगरें दी ब्हादरी दे गीत बी तूं गाए दे
दूरें-दूरें धोड़ी इं’दे चर्चे पुजाए दे
दिक्खै भामें कोई इतेहास तेरा खोह्ल्ली, डोगरी
कु’न्न तुकी मिसरी पलाई घोली डोगरी ।
