कुड़ियें ते चिड़ियें भरनी डोआरी
देस बगान्नै चली जाना
गुड्डियां-पटोले इत्थें रेही जाने
बनियै बगान्ने चली जाना
कुड़ियें ते चिड़ियें भरनी डोआरी
देस बगान्नै चली जाना ।
रिश्कै दी गल्ल जानै निं कोई
भागें दे लेख पछानै निं कोई
हिरखै दे बागें च हसदी ही खिड़-खिड़
कटदी ध्याड़े रोई-रोई
बाबल दे बागें दी नाजक कली ही
कंडें च पता नेईं रली जाना
कुड़ियें ते चिड़ियें भरनी डोआरी
देस बगान्नै चली जाना ।
उ’आं ते बाबल सब किश दिखदा
जोर निं भागें पर चलदा ऐ
केह् किश लिखेआ ऐ ओह्दे भागैं
सुकदा ऐ बूह्टा, जां फलदा ऐ
पता नेईं ओह्दे भागें दा सूरज
चढ़ना ऐ जां ढली जाना
कुड़ियें ते चिड़ियें भरनी डोआरी
देस बगान्नै चली जाना ।
धियां देआं रब्बा, भाग बी देआं
नेईं तां दुक्ख बझोंदा ऐ
कंडा चुब्भै कदें धियें गी लोको
तड़फियै बाबल रोंदा ऐ
किस भेसै च लब्भना ऐ रिश्ता
कुसने कुसलै छली जाना
कुड़ियें ते चिड़ियें भरनी डोआरी
देस बगान्नै चली जाना ।
कुड़ियें ते चिड़ियें भरनी डोआरी
देस बगान्नै चली जाना
गुड्डियां-पटोले इत्थें रेही जाने
बनियै बगान्ने चली जाना
कुड़ियें ते चिड़ियें भरनी डोआरी
देस बगान्नै चली जाना ।
