चुप्पी अन्दर चीकें रातीं खासा ख'ल्लर पाया
में ते मेरी चुप्पी दौनें किट्ठे सोग मनाया।
सारी रात निं सुत्ता यारो में चीकें दा मारा
जिन्ना सांभाँ चुप्पी गी में उन्ना पवै खलारा
दिक्खी साढ़ी खुड़बो-खुड़बी पक्खरु इक्क रड़ाया
में ते मेरी चुप्पी दौनें किट्ठे सोग मनाया।
बधन लगा जद् चीकें कन्नै मेरा मता फसाद
चब्बी लैता अक्क ते खाद्दा पीड़े दा प्रसाद
होकें आह्ली टकोरें कन्नै मासा चैन हा आया
में ते मेरी चुप्पी दौनें किट्ठे सोग मनाया।
घाएँ दी मलह्मै दा फाह्टा चीकें पर टकाया
रत्तू आह्ला शर्बत किप्पी डीको-डीक पलाया
अत्थरुएँ गै साँझ नभाई बिच-बचा कराया
में ते मेरी चुप्पी दौनें किट्ठे सोग मनाया।
—————————————————-
