किश निं साढ़ा अपना ऐ
जो किश ऐ सब ओह्दा ऐ
ओह्दा दित्ता अर्पन उसगी
केह् असेंगी घाटा ऐ
हत्थैं कीता दान जो होंदा
होर निं जतनैं होंदा ऐ
रूप शलैपा चार ध्याड़े
सदा निं र'वै शलैपा एह् ।
ओह्दे शा बस उसगी मंगना
होर निं किश बी मंगना ऐ
रौली कन्नै हिरख निं निभदा
चुप्पी गै नंभादी ऐ
हत्थैं कीता दान जो होंदा
होर निं जतनैं होंदा ऐ
रूप शलैपा चार ध्याड़े
सदा निं र'वै शलैपा एह् ।
पीड़ जो बुझन बिन अक्खें दे
पीड़ जो बुझन बिन कन्नें दे
बिरले मैह्रम होंदे न
पीड़ बी लब्भै पीड़ निं जा एह्
तां फेर पीर की करना ऐ
हत्थैं कीता दान जो होंदा
होर निं जतनैं होंदा ऐ
रूप शलैपा चार ध्याड़े
सदा निं र'वै शलैपा एह् ।
ब'रे न लगदे यार बनांदे
बैर ते पांदे लगदा पल
कुसै दी पर अज्ज बनदी गल्ल
कुसै दी ‘यश’ एह् बनदी कल्ल
हत्थैं कीता दान जो होंदा
होर निं जतनैं होंदा ऐ
रूप शलैपा चार ध्याड़े
सदा निं र'वै शलैपा एह् ।
