रंग नमें खलारे रुत्ता नैं, ते नमां नबेल्ला प्यार होआ
अज्ज हिरखी हद्दां टप्पनेगी, मन अपने-आप त्यार होआ
रंग नमें खलारे रुत्ता नैं, ते नमां नबेल्ला प्यार होआ।
फुल्ल कलियें ब्हार बसैंती ऐ
भौरें तै जिंद लुटानें दी
हिरखै दी बाजी इस रुत्ता
मरी-मिटियै तोड़ चढ़ानें दी
अज्ज मोर बी धरती पा पालां, गासा कूंजे डार होआ
रंग नमें खलारे रुत्ता नैं, ते नमां नबेल्ला प्यार होआ।
अज्ज उम्बली उम्बली जा करदा
मन अपना आप नेईं सांभै दा
एह् अनडर बे परबाह होइयै
अज्ज सज्जनें पास्सै हांबै दा
कोई हिरखी कौल करारें तै, एह् काह्ला बे शुमार होआ
रंग नमें खलारे रुत्ता नैं, ते नमां नबेल्ला प्यार होआ।
दिक्खी रुप शलैपा धरती दा
चन्न सूरज टपला खा करदे
अंबरै दा सब सतारे बी
अज्ज थल्लै दिखदे जा करदे
एह समां सुहामां जिंदे, दिल मेरा बेकरार होआ
रंग नमें खलारे रुत्ता नैं, ते नमां नबेल्ला प्यार होआ।
————————————————————-
