शब्द
प्रार्थनाएं च
रुज्झे दे हे
मास्क दे पिच्छें चुप्प-चपीते हरान-परशान
नाराज जन
फेफड़ें च आई बड़े दे इक अनचाहे परौह्ने करी ।
फेफड़ें दे नज़दीक गै धड़कदे दिलै ने निं छुड़ेआ हौसला
मुखरत हा
स्पर्श राहें
निं हारेआ, निं घाबरेआ
ताप ते खंघु नै ढिल्ली पेई दी जिंदु दी पिठ्ठी पर
लिखदा रेहा हिरखी कवितां।
प्यारी स्त्रियें लाह्म्मे-न्होरे रक्खी तौकड़े
पूरे तन-मन कन्नै
कलाबे च भरी लेआ हा
बेरौंस, बेबस, बेआस जीवन ।
निक्की-निक्की परवाह्
सिद्धी भिड़दी रेही इक्कलखोरी नै
ते कविता गै ही इक मात्र गुआह् !
कविता गै होंदी ऐ इक मात्र गुआह्
किश बी निं करदी नजरअंदाज
सब करदी दर्ज अपने अंदर,फ्ही बुहासरदी
जि’यां पैह्ली बरखा !
जि’यां पैहली रश्म!
जि’यां यकलख्त बगै आई ठंडी ब्हा!
जि’यां मनभाना गीत!
जि’यां बिछड़े दा कोई मीत!
