गुड्डियां सब्भै इक्कै नेइयां होदियां न
रंग बक्खरे, घाट-डजैन होई सकदे न बक्खरे
निक्की गी गुड्डी
ते बड्डी गी बशक्क आखदे गुड्डा
पर होंदी ओह् गुड्डी गै
पढ़ी-लिखियै अपने पैरें पर खड़ोती दी होंदी
एह्मे जानी पसोती दी होंदी।
गुड्डी गासै च किन्ना बिस्तार पांदी ऐ
किन्ने अरामै नै अपनी थाह्र बनांदी ऐ
एह्दे च गुड्डी दी केह् बड़ेआई
बड़ेआई ते गुड्डी बधाने आह्ले दी ऐ
बड़ेआई कन्नी देने आह्ले दी ऐ।
गुड्डी कन्नै बज्झी दी ऐ ओह्दी डोर
ओह्दे हिरदै दे च’ऊं चैम्बरें इचा लंघदी
तलामै कन्नै।
ते डोर होंदी ऐ कुसै गुड्डे दे हत्थ
फगड़ी दी होंदी कुसै गुड्डे ने फिरकी
केईं गुड्डे मारदे बभलियां
कालियां ऐनकां लाइयै
जरदे आह्ले पान चबाइयै
आपें-चें पेच लड़ाइयै
बो काट्टी आ.....
ते गुड्डी तलामें समेत
कटोई जंदी ऐ।
———————————
