इक ही गौ
ना खुरली ना गै भौ
ना गै कोई गलामां
बस इक खुंड
जिस कन्नै कदें कुसै ब’न्नी होग ।
स’ञ घरोंदे
आई खड़ोंदी
कोल खुंडै दे ढुकियै इन्ना
अश्कें
गल होऐ रस्सा उन्ना
बौंह्दी बी ओह् इ’यां गै ही
अश्कें कुसै ने ब’न्नी दी ही ।
ना उसगी कोई बडलै खिददा
ना स’ञां कोई उसगी सददा
जे कोई बग्गड़ फेरा पांदा
जां कुतै कोई बच्छु रम्हांदा
ढौंदी-पौंदी उट्ठी खड़ोंदी ।
हून ओह् खुंड बी नेईं हा
अश्कें उसगी
एह् थौह् बी नेईं हा
स’ञां औंदी
उस थाह्रा बौंह्दी
अगलियां ल’त्ता नेड़ियां करियै
पिछले खुरें र ठुड्डी टकाई
अक्खां मीटी सेई जन जंदी
दिन चढ़ने शा पैह्लें उट्ठी
खबरै केह्ड़े रस्तैं पौंदी ।
अज्ज दिन चढ़ेआ
ओह् निं उट्ठी
मुंडी भुञां
ठुड्डी बी
खुरें र निं ही ।
लोक खड़ोते
बलगा हे करदे
उसदे उट्ठने गी
उसदे हिल्लने गी
पर
ओह्दे नक्कै अग्गुआं
ना भुब्बल उड्डरी
ना खब्बल हिल्लेआ ।
हल्लै-म्हल्लै चर्चा होई
मैझर पे–
अजीब ही ओह् गौ !
उंहुं !
अजीब नेईं, बस गौ ही ।
की औंदी ही?
कदें आई ही ।
हून ते गल रस्सी बी निं ही ।
कदें ते ही ।
की नेईं बिस्सरी उस रस्सी गी ?
वक्त मनै पर जो नक्श करदा ऐ
मन कदूं बसारदा ऐ उसगी ।
