औंगली ङूठियां गला च गैह्ने
सुंदर ऐ मूरत टल्ले सफैने।
दिक्खियै हर कोई सीस नुआंदा
मिली थुआढ़े नै भाग सरांह्दा
रीझें-रीझें भरी लैंदा नैनें
सुंदर ऐ मूरत टल्ले सफैने।
मुस्कान तुं’दी जादूं ऐ करदी
सोचदा माह्नू लब्भी’आ दर्दी
न्हेरै उस्सी किश लभदे टटैने
सुंदर ऐ मूरत टल्ले सफैने।
जदूं आस कोई तुं’दे शा लांदा
परता सुनियै ओह् पच्छोतांदा
बदलदे उसदे जीवन दे मैह्ने
सुंदर ऐ मूरत टल्ले सफैने।
मूरत थुआढ़ी किश होर लगदी
दिक्खियै मनै गी टनकोर लगदी
कठिन होई जंदा बचे साह् लैने
सुंदर ऐ मूरत टल्ले सफैने।
मनै गी धिक्का लगदा बचित्तर
लभदा जदूं बी असली चलित्तर
आखदा ‘केसर’ तुं’दे क्या कैह्ने
सुंदर ऐ मूरत टल्ले सफैने।
