रुहै दी पीड़ कुसी सनाचै
दर-दर ठोकरां ऐह्में खाचै
जेकर जरै कोई थोह्ड़ी साढ़ी
लुंबरा अस-तुस कल्ले बुझाचै
रुहै दी पीड़ कुसी सनाचै
दर-दर ठोकरां ऐह्में खाचै ।
सब्भै आखन एह् केह् होएआ
हक की साढ़ा सदा लटोएआ
कर्जे बी अस म्हेशा चुकाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
डिग्रियां करियै बैठे नुक्करैं
जन्नीं चुक्की मारचै कुप्पड़ैं
बगाने घर जाई रम्हाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
अपने घर बगान्ने अस
रूह् बी की सतान्ने अस
फ्ही बी रज्जी बलियां चढ़ाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
मिट्ठी खंड ऐ साढ़ी बोल्ली
जरने आं पीड़ां तोल्ली-तोल्ली
लगदा कौड़ा सच गलाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
रौला-रप्पा साढ़े बेल्लै
प्रीत बदलोंदी इक्कै ठेलै
मसाल तुप्पी जड़ियां खढाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
चिंड ऐ साढ़ी डोगरी बोल्ली
पीड़ निं होई दनां बी हौली
फ्ही बी सुए जैह्री लुआचै
दर-दर ठोकरां ऐह्में खाचै
रुहै दी पीड़ कुसी सनाचै
रुहै दी पीड़ कुसी सनाचै ।
कोई ते सुनै एह् मजबूरी
कु'त्थै करचै जाई मजदूरी
बेरोजगारी कुसी सनाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
बिस्कुट लेई ञ्याणे रोन
दुद्ध बिना एह् भुक्खे सौन
चुड़ेआ ढिड्ड, केह् खलाचै
दर-दर ठोकरां ऐह्में खाचै
रुहै दी पीड़ कुसी सनाचै
दर-दर ठोकरां ऐह्में खाचै ।
