सुनियै बी लोकें दियां दर्द भरियां क्हानियां
जोकियां भरोंदियां निं अक्खियां नमानियां ।
आम नेही गल्ल इस्सी सब मन्नी लैंदे न
करदे निं मदाद, यरो, सब होंदे-सैंदे न
करै दा निं कुसै पर कोई मेह्बानियां
जोकियां भरोंदियां निं अक्खियां नमानियां ।
अक्सर मखौलै इच गल्लै गी डुआंदे न
धैंथियें दी र्हानगी नै झड़ी जन लांदे न
सुनदे निं गल्ल पूरी, सगूं पौंदे गाह्नियां
जोकियां भरोंदियां निं अक्खियां नमानियां ।
रेह् दी निं संवेदना ऐ अज्ज कुसै मनै च
लगदा, मनुक्खता ऐ बस्सी गेदी बनै च
हर कोई कुसै दियां करै हासोहानियां
जोकियां भरोंदियां निं अक्खियां नमानियां ।
सुनियै बी जानी, अनसुनी करी जा ‘रदे
ङ्हूरे भरी-भरी गै फर्ज बी नभाऽ‘रदे
खिंझी-खिंझी मारदे न बेहियै झमानियां
जोकियां भरोंदियां निं अक्खियां नमानियां ।
आपूं जदूं कदें कुतै चुब्भां बिंद लगदियां
दिक्खो, कि’यां छम-छम अक्खियां फ्ही ब’रदियां
औंदियां न याद फ्हिरी, ‘केसर’ अदूं नानियां
जोकियां भरोंदियां निं अक्खियां नमानियां ।
