केह् सनांऽ
कुन्न सुनदा मेरी अर्जी
लक्खें टन्नें बद्धियां लकड़ियां
जाता मेरे ठुस्सी-ठुस्सी
करन फ्हीं बी
मेरी अलगर्जी।
सत्ता-सवेलै उट्ठी
जंदे आई मेरे कश
भांत-सभांती लकड़ियें कन्नै
मिगी कराने गी पच्छ।
नाह्री-सबैरी
पकाई-पकाई
ञ्यानें-स्यानें
खान सुआद
लाई-लाई।
द्रौंकल, बरैंक्ड़ दे त्रिक्खे नुक्कर
गरना, ककोए, खेर
ते
कीक्कर
बालन मेरी जाता उप्पर
ना समझ
छोड़ी मेरी फिक्कर।
पुच्छै निं डोल मेरी कोई
दस्सां बी कि’यां
कुस अग्गै दस्सां
रोई-रोई।
मेरी अक्ख, क'न्न, नक्क,
दंद, जीह्भ, तालु ते बुल्ल
तपश ते भांडें दा भार
करी-करी सैह्न
जंदे होई खुश
जैह्लै कदें त्रुट्टै
एह् मोई चुल्ल।
फ्हीं परतियै लिप्पी-परोली
बडलै थमां स'ञां
स'ञां थमां रातीं
जरनी तपश किन्नी
अ' ऊं अपनी छाती
की जे
अ'ऊं चुल्ल आं
मेरा धर्म ऐ
सैह्नशीलता मेरा कर्म ऐ।
———————-
