पंजै किट्ठे दरेआ पंजाब दिक्खे
ठठ्ठे लाई खड़ाकें नै हाड़ दिक्खे
लाड़ी चली रफेह्रै शंगार करी
झुंड गुहाड़दे डोगरे प्हाड़ दिक्खे
ढक्की गुमटे दी चढ़ी रहान होआ
पीर मिट्ठे दी बक्खरी शान दिक्खी
फ्हिरी कित्ती डनौत रघुनाथ जी दै
बोली डोगरी खंडू दी खान दिक्खी।
मंदर देवका ते राम नग्गरै दे
दिक्खी भुल्ली निं साथिया बुद्ध जायां
करेआं दर्शन मान तलाइयै दे
महादेव गी दिखदा सुद्ध जायां।
छाती बजर ते पिन्नी फौलाद जि’यां
डौले घड़े बदान खनेडा दे
इंदरपुरी सजाई दी धूनै दिक्खी
ते पृथ्वी चौहान मर्द जखेडा दे
साईं बाबे दी दिक्ख दरगाह् सोह्नी
ते सोह्नी बनी मसीत बसार दिक्ख
नाग बासकी सरै बजार जि’यां
भीम पांडुएं दा पैह्रेदार दिक्ख
संग ,लौह्दरा ते मंग दस्सै सारतीं ने
बिच्चैं बगदी ऐ निक्की नेहीं नैह्र साथिया
मंदर शिवें दे संदूर सोह्बै सींधिये दा
दमै उज्झ ते मनदूर धोंदे पैर साथिया
कीले याद न बसंत दी कराई जा'रदे
कन्नै करै दे सुआल पाई घेरा मालका
कुत्थें गे बंदराल कुत्थें राज गद्दियां
बाद रक्खेआं बसंतगढ़ मेरा मालका
क्हीम सैंत भन्नै सन्न ते बमारियां
भगतराम लांदा कालजै कटारियां
इत्थें भूत ते प्रेत नस्सदे जोगनी समेत
सैल्ले बीरनी दे दिक्खी जायां फाट जी
शाही-मट्ठे कन्नै फिरदे घराट जी
मेरे बाग बसंतगढ़े दी सैल्ली रक्खेआं डाली
परदेसी तेरा कक्ख बरोबर
तूं सभनीं दा माली।
———————-
