जेह्ड़े उतरे नदियें अंदर, ओह् होई बी जंदे पार
जो बन्नै रौह्न खड़ोते, निं पार ते निं ओह् रोआर ।
जित्त रड़क तरै दी अक्खीं, उत्त सुखने कु'त्थै मठोन
हत्थें शा किरे पलें गी नित्त नैन कटोरे रोन
चेतें गी घोखी-घोखी बी लंघङन घड़ियां चार
जो बन्नै रौह्न खड़ोते, नि पार ते निं ओह् रोआर ।
हिरखी गी हिरख जे थ्होऐ, मन निरा समुंदर होऐ
हिरखें इच हिरख मठोऐ, एह् दुनियां सुंदर होऐ
ओह् तारी बी निं पौंदा , डुबदा ऐ धारो-धार
जो बन्नै रौह्न खड़ोते, नि पार ते निं ओह् रोआर ।
कदें सोच पखेरू झूरन ,तां राह्-रस्ते पलचोन
कदें सोच पखेरू गासा,किनमिन कनियें परतोन
एह् सोच गै मीरा राधा, एह् सोच गै जित्त ते हार
जो बन्नै रौह्न खड़ोते, नि पार ते निं ओह् रोआर ।
नित्त नमें गै सांचै ढलना, नित्त नमियें मेदैं पलना
निक्का नेहा कम्म ऐ करना, हासे चुप्पी पर धरना
मत्थै दे लीक- बलीकै नै कैंह् करनी तकरार
जो बन्नै रौह्न खड़ोते, नि पार ते निं ओह् रोआर ।
………………………………………………………………
