जिन महावीर महान
पूजदा, जस गा दा जग सारा
चुब्भी ज्ञानसरोवर ला मन
बदलै जीवन-धारा।।
बैर-भाव नेईं कुसै'नै, सब'नै
मित्री करियै जीना
मंदा कुसै दा नेईं चेतना
पाप-जैह्र नेईं पीना।।
सब अपने,कोई नेईं बगाना,
जग आतम-बस्तारा
चुब्भी ज्ञान-सरोवर ला मन
बदलै जीवन-धारा।।
मोह् नेईं कुसै बी जड़-चेतन'नै
राग-द्वेष नेईं रखना
कूड़-कपट, लालच,निंदेआ
हंकार 'शा रौह्ना सखना।।
पक्क बड़े कर्में दे बन्धन
कठन बड़ा छुटकारा
चुब्भी ज्ञानसरोवर ला मन
बदलै जीवन-धारा।।
करनी दा फल भोगने पौंदा
बस, अपने-आपै गी
साक-संबंधी नेईं भोगदे
कुसै दे संतापै गी।।
पाप-कमाई कदैं निं करनी
होंदा नेईं निस्तारा
चुब्भी ज्ञान-सरोवर ला मन
बदलै जीवन-धारा ।।
जिन महावीर महान
पूजदा,जस गा दा जग सारा
चुब्भी ज्ञानसरोवर ला मन
बदलै जीवन-धारा ।।
——————————-
