जे कदें सोचदी होग ते केह् सोचदी होनी
कोई न कोई गल्ल दिलै गी कचोटदी होनी
हिरखै दी अग्ग बशक्क हून ठंडी पेई गेदी ऐ
भुब्बलै च गै चंघैड़ा कोई धलोफदी होनी।
केईं-केईं रातां जागो-मीटी च लंघदियां होनियां
चन्न-तारें कन्नै भेत दिलै दे फरोलदी होनी
कु'न हा स्हेई ते कोह्दा हा कसूर निं माये
अपने गै स्हाबें ओह् समें गी छोलदी होनी।
कदें-कदें चेता करियै मेरे गीत गजलें गी
हस्सी पौंदी होनी कदें लेखें गी कोसदी होनी
चानचक्क कुतै पैरा कोई बज्जी जंदा होना
किश घबराइये मेरा नांऽ मनें च बोलदी होनी।
कदें झुल्ली पौंदे होने सिल्ले जेह् फनाके कुतै
भरी-भरी होके मोई बलल्ली बनी डोलदी होनी
फ्ही जिम्मेवारियें दे ख्याल आई जंदे होने
चेतें गी लाम्बू लाइयै जिंद फ्ही रोलदी होनी।
————————————————
