घर-घ्रिस्ती दा ऐ साधन होई गेआ दागी-काणा
माह्नू बी अज्ज खिल्लरी-खिल्लरी होई गेआ दाना-दाना
जुगें दी इक भरोटी दे अज्ज सुब्बे गे न त्रुट्टी
रुहैं दे रूह घुली गे न दिक्खो फुट्टी-फुट्टी
धरत बी कंबन लगी, दिक्खो रेहा निं कोई ठकाना
माह्नू बी अज्ज खिल्लरी-खिल्लरी होई गेआ दाना-दाना ।
कीमत होई ऐ माह्नू दी हौली सारे पास्सै
जीना हर मनुक्खै दा अज्ज लटकेआ उप्पर गास्सै
कोह्दा अज्ज बसाह् करचै, होऐ कि’यां जकीन
बिना फंघें उड्डेआ माह्नू सौखा तुप्पन जीन
तीला-तीला होएआ जीना, कि’यां समाज चलाना
माह्नू बी अज्ज खिल्लरी-खिल्लरी होई गेआ दाना-दाना ।
केह् करा ना ऐं तूं मनुक्खा, समझ निं आई तेरी
तेरी जोआनी केह्ड़े पास्सै लटकी ऐ, मड़ेआ फेरी
होई नलामी, पैसे पिच्छें दौड़ी खिट्टैं पेआ ऐं
जोर-जोआनी, लालच पिच्छें अपनी रुढ़ी गेआ ऐं
की जोआनी उच्छली-उच्छली लगी फ्ही कलवाना
माह्नू बी अज्ज खिल्लरी-खिल्लरी होई गेआ दाना-दाना ।
फले दा बूह्टा फल बी दिंदा, कन्नै बूह्टैं रौह्न
मेहनत दे फल मिट्ठे होंदे, पक्के दे जे थ्होन
बाग बी सैल्ले, फल बी कच्चे त्रोड़ी मन पतेआन्ना ऐं
उग्गे-उगाए दे बागें गी तूं जानी घड़ी टकान्ना ऐं
ओ सबर निं रेहा इस जोआनी, बेसबरी लगी नचाना
माह्नू बी अज्ज खिल्लरी-खिल्लरी होई गेआ दाना-दाना ।
कैसा जमान्ना आई खड़ोता गंढ निं बझदी पक्की
माह्नू गै अज्ज माह्नू दी गल्ल निं सुनदा सच्ची
बड्डे-निक्के दा फर्क हा होंदा, पड़दा निं रेहा कोई
मेल-मलाप औखे होइई गे, जीना गेआ लटोई
हिरखी रोग मनै दा जाइयै कुस्सी हुन सनाना
माह्नू बी अज्ज खिल्लरी-खिल्लरी होई गेआ दाना-दाना ।
‘कादिर कुंडरिया’ कोह्दे स्हारै जीना इस जमान्नै
डबरी गोते सुद्धे कराए, छुड़ेआ नेईं शतानै
रेह् बचे दे साह् ओह् मेरे दुखें लुट्टी ले
ओ इज्जत आह्ले झंडे साढ़े जढ़ें दा पुट्टी गे
हुन ते रोको , मेरा मड़ेओ, रोना की करलाना
माह्नू बी अज्ज खिल्लरी-खिल्लरी होई गेआ दाना-दाना
घर-घ्रिस्ती दा ऐ साधन होई गेआ दागी-काणा
माह्नू बी अज्ज खिल्लरी-खिल्लरी होई गेआ दाना-दाना।
