जे होना ऐ, होइयै रौह्ना
किस गल्ला पच्छोताना ऐ
कु'न जानै जे कुसदा इत्थै
किन्ने चिर आबोदाना ऐ।
उसदी माया अत्त नराली
ते मायाजाल अनोखा ऐ
तूं बी माया, में बी माया
सब नजरीं दा गै धोखा ऐ
हून भमैं सब बक्खो-बक्ख आं
खीर इक्कै ठौर-ठकाना ऐ
मित्ती नै भोलेआ आखर
मित्ती गै होई जाना ऐ
कु'न जानै जे कुसदा इत्थै
किन्ने चिर आबोदाना ऐ।
नजरी दा बस्तार बधाऽ तूं
कत्थ सबूरी तत्थें बिच्च ऐ
कठपुतली एह् जीवन सारा
डोरी उसदे हत्थें बिच्च ऐ
उस गै ढिल्ली डोरी कीती
समझै कु'न पर उसदे शारे
पूरब,पच्छम,उत्तर,दक्खन
नापै करनां चन्न -सतारे
जिन्ने तक्कर उसदी मरजी
उन्ना गै ताना-बाना ऐ
उस गै मांझी बनियै औना
ते मछुआ पार टपाना ऐ
कु'न जानै जे कुसदा इत्थै
किन्ने चिर आबोदाना ऐ।
ऐह्में सारा समां गुआया
केह् तूं सारी उमर कमाया
पीड़ मठेरी चरगी-चरगी
जीवन चक्कर समझ निं आया
लेख लखोई गेदे जिसदे
तूं बीज अजें ओह् राह्ना ऐ
करने आह्ला करियै बैठा
मेह्नत तेरी बस ब्हान्ना ऐ
कु'न जानै जे कुसदा इत्थै
किन्ने चिर आबोदाना ऐ।
नां किश तेरा, नां मेरा ऐ
सब माया दा गै घेरा ऐ
जीने दा जेकर चज्ज आवै
तां जीने ताईं बत्हेरा ऐ
प’ञें तत्तें बिच्च समाया
साहें दा ताना-बाना ऐ
जो होना ऐ, होइयै रौह्ना
किस गल्ला पच्छोताना ऐ
कु'न जानै जे कुसदा इत्थै
किन्ने चिर आबोदाना ऐ।
