तेरे काल्पनक
आह्लड़े गी
तज्जने दे
नेकां जतन कीते न
पर
फंघ सोआकने ते
डोआरी भरने दा उद्दम
तेरी हांबै च
सैह्कदा रौंह्दा ऐ ।
तेरे शोशें दी वास
फिफ्फरै भरना रोज
तोला जीन्नां
मासा मरना रोज
थौह् बी ऐ
जे तेरा रत्त चुसू संग
अनमिथे घाटे दा गै सौदा ऐ
मेरे तांईं
जिसी झल्लै दा अचेतन
ब'रें थमां
मेरियां मेरे कन्नै
ते तेरे कन्नै
जो रंजशां न
जो बदला लैना ऐ
तूं मेरे कोला
में तेरे कोला
उं’दा स्हाब
बरोबर होंदा सेही होआ ऐ
मेदें दे लक्खां त'पोले
जीवन दे सत्तरंगे गासा प
लिशकदे सेही होए न
अज्ज मिगी
जो मेरे अचेतन गी
छड़काना चांह्दे न
काल्पनक गलामी थमां
आले मारी-मारी
मेरे रुं-रुं च
जौह् भरदे सेही होए न
अज्ज मिगी।
