मौसम होआ बांदा, ब्हार बदलोई ऐ
गास सनैह्री होआ, कालख धनोई ऐ
कंढियैं सरूट ते प्हाड़ैं काही फुल्ली ऐ
हसदी- हसदी सुरगै दा कुदरत उ'ल्ली ऐ ।
सीतू बी बल्लें- बल्लें लगी पेआ बोल्लन
ठंडू आह्ली सार लगा कन्नें बिच्च घोलन
बडले दी ब्हा बी बर्फीली बिंद होई ऐ
गास सनैह्री होआ, कालख धनोई ऐ ।
चटैन चिट्टा नित्त नमां बडला ऐ उग्गै दा
सूरज बी रेही- रेही अम्बरै'र भुग्गै दा
बडला बी बांदा, होई स'ञ बी बांदी ऐ
रात नित्त रौनक हुन तारें दी लांदी ऐ
उड्डी गेआ आलस होई जिंद नरोई ऐ
गास सनैह्री होआ, कालख धनोई ऐ ।
मौसम सुहाना सोह्ना सैर करने दा हुन
हुम्म,गु'म्म गर्मी नेईं पर्सा जरने दा हुन
पुट्टी लेआ डेरा हुन गासै परा बदलै
भरै दे डुआरी पैंछी नित्त स'ञै- बडलै ।
बदलै दा डेरा गेआ भलेआं चकोई ऐ
गास सनैह्री होआ, कालख धनोई ऐ ।
गासै परा नामां अज्ज बदल कटाई गे
खुशी आह्ली लैह्र बनी हिरदैं समाई गे
टुरी गे बदल खीर डंडा डेरा चुक्कियै
प्हाड़ें, जाड़ें, धारें पर सैलतन सु'ट्टियै ।
साह् होआ सौखा बिंद गर्मी थम्होई ऐ
गास सनैह्री होआ, कालख धनोई ऐ ।
