पतंग--
चरखी पुच्छै उडदी पतंग मिगी छड्डी कु’त्थै रेही
तेरा चेह॒रा दिखदी जां, तेरी चाह् च उड्दी जां
बन्होई र’वां तेरे बंधनै, ब’न्न-बन्हाऽ तेरे कन्नै
पक्की डोर थवां ताकत पां।
गासै-समुद्रै तरदे, बांवें लुआरे लै ‘रदे
रंग-बिरंगे फंघड़ुएं कन्नै, खु’ल्ले फैले शमानै
उडदी पतंग लेई उमंग लैह्राए अपने वतन
बांदी-ब्हार मगन मस्त लगन।
चरखी-चरखी, ब्हा कन्नै तु’म्मी डोल
ढिल्ली छोड़ बिंद क डोर
लैन दे मते लुआरे, भरन दे किश मती डुआरी
इक होई दी जमीं-गासै दी सोच।
आस बनांदे अरमानें, रौनक औंदे वीरानें
पखरुएं दी परवाज, साजें दी अवाज
घुलदी-मिलदी उडदी पतंग
फैले-फलाऐ खुशी दी तरंग।
फ्ही बी र’वै चरखी कन्नै, इ’दे कन्नै बन्होई-बझोई
बगैर चरखी परवाज नेईं, ढोलें दी अवाज नेईं
उच्चरी डुआरी आगाज, अनछुहे सुरें दा साज
बलगी-बलगी बलगित्तै, बेकरार डुआरी नेईं।
----------------------------
