तरजमानी

खरी नीत गुमनामी च
कनीती नेकनामी च
माड़े-मनभाने लफ्जें च
दिक्खे-अनदिक्खे फर्जें बिच्च

ओपरी पन्छानें च
पीसी दी मुसीबतें च
धुखदी सम्हालें च
इश्ट-मित्तर बखलें इच्च

मिट्ठे-कौड़े बचनें च
सज्जनें-बैरियें च
जमघटें-मैह्‌फलें च
नबेकले रस्तें बिच्च।

सौंगड़ी सोचें इच्च
धरेठी कत्थें बिच्च
तरजमानी खमोशी च बी सुनदे रेह्
ते सुनियै बी खमोश रेह्
सख्त-नरम हदें च सबर करियै
अक्खर समझदे उमर बतीत होई
बे-खबर बे-इल्मी रेह्
पढ़ौकल होइयै बी निरक्खर रेह्।    
 -----------------------