सुखने दियां गल्लां तां
गल्लां गै होंदियां न
पर मेरा सुखना
मिक्की इ’यां बझोआ
ओह् कोई सुखना नेईं
इक हक़ीक़त ऐ जियां
तूं, ते तेरे चरखे दी खन-खन
ते शिजुए पेदियां कत्ती दियां पूनियां
तेरे बुल्लें दे उप्पर मिट्ठड़े गीतडू दी तान
सब हक़ीक़त गै बझोआ दी ही।
पर अक्खीं खोलदे गै
सुखना ते नेई रेहा
पर झनोती पैदा
तेरा चरखा
मिक्की तेरा चेता कराई गेआ
सुखने च बी तूं ते
तेरा चरखा गै लब्भेआ हा
मेरी अक्खिएं च
तेरी फ्ही सूरत बनी गेई ही
जि’यां सच्चें गै मिक्की
फ्ही तूं लब्भी गेई
किन्नियां गल्लां तेरियां
फ्ही चेते आई गेइयां
ओह् चरखे दी खन-खन
जदूं बी बज़दी ही
अ'ऊं समझी लैंदी ही
कि हून भ्याग होई गेई
ते शैद तूं उठ्ठी गेई ऐं
ते आऊं बी उट्ठियै
त्यार होई जन्दी ही
अपने स्कूले गी जाने आस्तै।
पर हून झनोटी पर पैदा
केईं सालें दा तेरा चरखा
कुसै बी नेई हलाया
हां, मिक्की पता ऐ
कि हून एह् घर
सुन्ना ऐ तेरे बगैर
सारियां रौह्नका
तेरे कन्नै गै मुक्की गेइयां
घरें दे दराजें लगे दे जन्दरे
इस दी गबाही दिंदे न
पर तेरियां यादां
अज्ज बी घरै दे अंदर-बाहर रौंह्दियां न
ते मिक्की तेरा चेता करांदियां न।
————————————
