में तुगी दस्सी सकदा हा
जे कोह्दे कोला बचियै रौहेआं
ते
कोह्दे उप्पर भरोसा करेआं
जे कु'न मिट्ठा-मिट्ठा बोल्लियै
ते प्यारा-प्यारा मुस्कराइयै
तुगी डंग लाग
ते
कोह्दे मत्थे दी त्रिबढ़ी दिक्खियै
ते निक्खर सुनियै
मत सोच्ची लैं
जे ओह्दे मनै च
तेरे लेई हिरख नेईं है--
एह् सब किश
में तुगी दस्सी सकदा हा
पर में नेईं दस्सेआ
में तेरे कोला
तेरा हक निं हा खूसना चांह्दा ।
भलेखे खाने
धोखे खाने
ठगोना
ते बिन मंगे
अनसंभ खुशी मिली जाने पर र्हान होना
एह् सब भोगना
भुगतना
मसूसना
तेरा अपना हक हा
इस्सै ने
तुगी ‘तूं’ बनाना हा
में एह् हक
तेरे कोला
खूसना निं हा चांह्दा
इसलेई, तुगी ओह् नेईं दस्सेआ
जो दस्सी सकदा हा ।
……………………………………
