किन्ने चाऐं धिये तेरे गाए हे सुहाग
मिगी निं हा भाखा तेरे जली जाने भाग
रक्खी लैएआं धिये मेरी पग्गा दी लाज
अऊं आं गरीब, दस्स कु’त्थू देआं दाज ?
सूहा सालू देई जदूं सौह्रै हा टोरेआ
मोतिये दे हारा चा अनमोल मोती तोड़ेआ
छम-छम अत्थरुएं नै धुची गे पैर
घर-घर चली पेई ऐ दाजा दी लैह्र
करी देएआं प्रभु अज्ज सारे इं’दे काज
अऊं आं गरीब, दस्स कु’त्थू देआं दाज ?
बिना दाजै सौह्रियें दे ताह्न्ने-मीह्ना बजदे
देर-जेठ, सस्स-सौह्रा शेरा जन गजदे
भैड़ी ऐ ननान बी, कुफर गै तोलै
कोह्दे कन्नै मना दा कोई गुबर फरोलै
कैंतै गी आखै हुन तेरे हत्थ लाज
अऊं आं गरीब, दस्स कु’त्थू देआं दाज ?
तुऐं इक चंदरी कलैह्नी घर आई
तां गै घर साढ़ै हुन लग्गी दी लड़ाई
चु’ल्ली च फकोई गेइयां हीखियां जे साढ़ियां
घर-घर दाज दिक्खो आह्न्ना दियां लाड़ियां
रानी आंह्गर बेहियै ओह् करा दियां राज
अऊं आं गरीब, दस्स कु’त्थू देआं दाज ?
फुट्टे न नसीब मेरे की अज्ज, मालका
पेई गेआ भागें अज्ज मेरे, ओ छालका
धियां निं गरीबें घर देआं तूं बाबला
चली पेआ किट्ठा हुन दाजा दा ओह् काफला
लुट्टी खाद्धा दाजा दे लोभियें समाज
अऊं आं गरीब, दस्स कु’त्थू देआं दाज ?
