कनून नराले इस दुनिया दे
दिक्खो लोको
सज्जनें मिलियै मित्तर मारे
दिक्खो लोको
सच्चा बैरी झूठ दुलारा
कि’यां बनाना
ते तौर-तरीके चज्ज एह् सारे
सिक्खो लोको।
घर-घर बने मैदाने जंग
दिक्खो लोको
केह् निक्के केह् बड्डे
मर्यादा भंग
दिक्खो लोको
अपने सक्के बक्खले बगाने
सब इक्कै खाते
ते बेल्लै-बेल्लै घड़ी-घड़ी
रंग बदलना
सिक्खो लोको।
खट्टा पेदी बुड्ढी माँ
तरसे पानी ई
दिक्खो लोको
गर्मी च शैल छबिलां
बरसे पानी
दिक्खो लोको
घर बैठी भुक्खी मां
बलगै टब्बरै गी
ते मन्दरें-मन्दरें
जग्ग कराइयै लोक रजाना
सिक्खो लोको।
मुँह् मिट्ठे खंड मिश्री बर्फी
दिक्खो लोको
रूह् कौड़ कसैली जैह्र सिज्जी
दिक्खो लोको
मिट्ठियाँ मिट्ठियाँ गल्लां करियै
जैडह्र उगलना
ते माड़ी-माड़ी अग्ग लौआना
सिक्खो लोको।
अज्ज औक्खी दुनिया औक्खे माह्नू
दिक्खो लोको
हिरख मोहब्बत दिल रिश्ते
सब धानू
दिक्खो लोको
रूह् रोंदी मेरी
जख्मी मेरे अपने कीती
ते हस्सदे-हस्सदे रोन छपैलां कि’यां
सिक्खो लोको।
——————————————-
