नकद ते दुहार

तूं मेरे ते अपने रिश्ते गी 
नकद नेईं 
दुहार समझेआ
ते दुहारी दा रिश्ता 
किन्नी क चिर चलदा।

तली ऊपर छाले साईं 
में उस्सी बत्थेरा सांभेआ
पर ओह् नेईं बचेआ
तूं समुंदर चांह्दी ही 
ते में इक चोई हा
तूं मीं कदें 
अपना नीं समझेआ
में तेरे ताईं कोई हा।

देह् दा बालन
मनै दी अंदरोठी
बलदा रेहा
धुखदा रेहा
बोलदा किश तां 
मुंहै चा सोआह निकलदी
चुप रेहा
ते
हिरखै दी बेही दे 
कोरे काकल उप्पर 
नूठा लाइयै
में सारा दुहार मकाया 
ते चली गेआ 
अनभाखी बत्ता।
----------------------